ഒച്ച

 നീ കേൾക്കുന്നുണ്ടോ

രാത്രി അതിനോടു തന്നെ

ഇഷ്ടം കൂടുന്നത്?

നീ കേൾക്കുന്നുണ്ടോ

പുഞ്ചിരി അതിനെത്തന്നെ

മായ്ച്ചു കളയുന്നത് ?

നീ കേൾക്കുന്നുണ്ടോ

ചിറക് അതിന്റെ തന്നെ

ചിറകടിയെ

മുറിച്ചു കളയുന്നത്?

നീ കേൾക്കുന്നുണ്ടോ

നിന്നെ നീ തന്നെ

വിളിക്കുന്നത്?

നീ കേൾക്കുന്നുണ്ടോ?

ഉണ്ടോ?

കേൾവിയുടെ കേൾവി ?

ഋതു

മഞ്ഞ്

കൊടും ശൈത്യം

എങ്കിലും കാണാം

നിറയെ

പ്രണയ മന്ദാരങ്ങൾ

പ്രണയ മിനാരങ്ങൾ

പ്രണയ മൈനകൾ

പ്രണയ നദികൾ

പ്രണയ മൊഴികൾ

പ്രണയ സൂര്യൻ

പ്രണയ നക്ഷത്രം

പ്രണയ.....

അന്ന് ....

മരങ്ങൾ മന്ദഹസിക്കുന്നതു കണ്ടു

ചെറുമഴയോടു ചേർന്ന് ഒരു കിളി

സല്ലപിക്കുന്നതു കേട്ടു

ഹൃദയമിടിപ്പിന്റെ ഉത്തമഗീതംപോലെ

സന്ധ്യയെ തൊട്ടു

 ജലം തുടിക്കുന്ന വേരുകളിൽ 

ഭൂമിയെ മണത്തു.

പ്രണയത്തിന്റെ തളിരിലകൾ രുചിച്ചു 

അങ്ങനെ എല്ലാം

എന്നേയ്ക്കും പുതിയതായി.